Sənaye və Texnologiyalar üzrə Gəncə Dövlət Peşə Təhsil Mərkəzində 2025–2026-cı tədris ilinin uğurla başa çatması münasibətilə "Məzun Günü" adlı təntənəli tədbir keçirilib. Gənclərin həyatında yeni bir mərhələnin başlanğıcını simvolizə edən bu əlamətdar gün yüksək əhval-ruhiyyə, səmimi duyğular və unudulmaz anlarla yadda qalıb.
Tədbirdə Mərkəzin direktoru Elmir Cəfərov, Gəncə Şəhər İcra Hakimiyyətinin nümayəndəsi Sənubər Qocayeva, T. Hacıyev adına 2 nömrəli Musiqi Məktəbinin direktoru Leyla Xəlilova, müxtəlif işəgötürən müəssisələrin nümayəndələri, şəhid ailələrinin üzvləri, pedaqoji heyət, valideynlər və çoxsaylı tələbələr iştirak ediblər.
Mərasim Azərbaycan xalqının Ümummilli Lideri Heydər Əliyevin və Vətənimizin müstəqilliyi və ərazi bütövlüyü uğrunda canlarını fəda etmiş qəhrəman şəhidlərin əziz xatirəsinin bir dəqiqəlik sükutla yad edilməsi ilə başlayıb. Daha sonra Azərbaycan Respublikasının Dövlət Himni səsləndirilib və iştirakçılar tərəfindən böyük ehtiramla dinlənilib.
Rəsmi çıxışlar zamanı məzunlar səmimi təbrik olunaraq onların gələcək həyat yollarında uğurlar arzu edilib. Bildirilib ki, peşə təhsili gənclərin əmək bazarında rəqabətqabiliyyətli mütəxəssis kimi formalaşmasında mühüm rol oynayır və bu gün məzun olan tələbələr qazandıqları nəzəri bilikləri və praktik bacarıqları ilə ölkəmizin inkişafına layiqli töhfələr verəcəklər.
Tədbirin bədii hissəsi xüsusi maraq doğurub. Tələbələrin təqdim etdikləri musiqi və rəqs kompozisiyaları iştirakçılar tərəfindən alqışlarla qarşılanıb, səhnədə nümayiş olunan çıxışlar isə gənclərin yaradıcılıq qabiliyyətini və istedadını əks etdirib.
Mərasim çərçivəsində tədris ili boyunca nümunəvi davranışları, yüksək akademik göstəriciləri və ictimai fəallıqları ilə seçilən tələbələr, həmçinin onların yetişməsində böyük zəhməti olan müəllimlər təşəkkürnamələrlə mükafatlandırılıblar. Bu təltiflər onların əməklərinə verilən dəyərin və gələcək uğurlarına olan inamın bariz ifadəsi kimi qiymətləndirilib.
Tədbirin sonunda məzunlar müəllimləri, valideynləri və dostları ilə birlikdə xatirə şəkilləri çəkdirərək, birgə rəqs edib və tələbəlik illərinin ən gözəl anlarını bir daha yaşayıblar. Səmimiyyət, sevinc və qürur hisslərinin hakim olduğu "Məzun Günü" hər bir iştirakçının yaddaşında xoş xatirə kimi qalaraq gənclərin gələcəyə inamla addımlamasına gözəl bir başlanğıc olub.
Famil Kəngərli
