Ermənistanın Baş naziri Nikol Paşinyan ölkəsinin “Üçüncü Respublika”dan “Dördüncü Respublika” mərhələsinə keçdiyini açıqlayıb.
igia.az xəbər verir ki, Paşinyan hökumətin iclasında 2026–2031-ci illər üçün hökumət proqramının “Real Ermənistan” ideologiyasına və “Dördüncü Respublika” konsepsiyasına əsaslandığını bildirib.
Baş nazir “Üçüncü Respublika” ilə “Dördüncü Respublika” arasındakı əsas fərqi belə ifadə edib:
“Üçüncü Respublika ilk gündən münaqişə məntiqi üzərində qurulmuşdu, Dördüncü Respublika isə sülh məntiqi əsasında formalaşıb”.
Paşinyanın sözlərinə görə, 1990-cı illərdə elan edilmiş Üçüncü Respublikanın əsas məqsədlərindən biri tarixi detllara aid olub və Qarabağ hərəkatı da bu konsepsiyadan qaynaqlanıb.
O bildirib ki, Ermənistan hazırda sülh şəraitində 2018-ci il “məxməri inqilabı”ndan sonra həyata keçirilməsi nəzərdə tutulan, lakin pandemiya, müharibə və müharibədən sonrakı böhranlar səbəbindən tam reallaşdırılmayan islahat gündəliyinə qayıda bilər.
Paşinyan hökumətin yeni proqramının gələn həftə Milli Assambleyada daha ətraflı təqdim ediləcəyini də açıqlayıb.
