Rusiyada ordunun şəxsi heyətə qəbul prosesini sürətləndirməsi və yeni səfərbərlik elan ediləcəyi ilə bağlı iddiaların yayılması ölkədə ciddi narahatlıq yaradıb. Xüsusilə hərbi xidmət yaşında olan kişilərin ölkədən çıxmağa başlaması diqqət çəkib.
igia.az xəbər verir ki, məlumata görə, son bir həftə ərzində 113 min Rusiya vətəndaşı Gürcüstan sərhədində yerləşən Yuxarı Lars keçid məntəqəsindən ölkəni tərk edib. Sərhəddə yaranan sıxlığın əsas səbəblərindən birinin yeni səfərbərlik ehtimalı ilə bağlı yayılan xəbərlər olduğu bildirilir.
Rusiyada orduya yeni şəxslərin cəlb olunmasının sürətləndirilməsi və hərbi hazırlıqların artırılması müxtəlif şayiələrə səbəb olub.
Rəsmi olaraq yeni ümumi səfərbərlik elan edilməsə də, xüsusilə hərbi xidmətə çağırılmaqdan ehtiyat edən kişilər ölkədən çıxmağa çalışırlar. Bu vəziyyət Gürcüstan istiqamətində əsas sərhəd keçidlərindən birində ciddi hərəkətliliyə səbəb olub.
Yuxarı Lars keçidi Rusiya ilə Gürcüstan arasındakı ən mühüm quru sərhəd məntəqələrindən biridir. Rusiyadan Gürcüstana getmək istəyənlər arasında bu marşrutdan istifadə edənlərin sayının artması sərhəddə uzun növbələrin yaranmasına gətirib çıxarıb.
Hadisələrin necə inkişaf edəcəyi və Rusiyada həqiqətən yeni səfərbərlik elan olunub-olunmayacağı ilə bağlı rəsmi açıqlamalar gözlənilir.
