Cəmiyyətləri yaşadan yalnız iqtisadi güc, böyük layihələr və yüksələn binalar deyil. Bir xalqın mənəvi dayağını qoruyan ən böyük sərvət insanlıq, mərhəmət və xeyirxahlıqdır. İmkanı olanın ehtiyacı olana əl uzatması, qazandığını cəmiyyətlə bölüşməsi, çətin gündə bir ailənin qapısını döyməsi insanın sahib olduğu bütün maddi dəyərlərdən daha üstün mənəvi ölçüdür.
Gəncənin ictimai-sosial həyatında sahibkarlıq fəaliyyəti ilə yanaşı, xeyirxahlıq təşəbbüsləri ilə də adı çəkilən Şahin, Rövşən və Elşən Məmmədov qardaşlarının həyat yolu məhz bu baxımdan diqqət çəkir. “İmperial” şirkətlər qrupunun rəhbərləri kimi fəaliyyət göstərən qardaşlar biznesin verdiyi imkanları yalnız şəxsi uğurun göstəricisi kimi deyil, insanlara fayda vermək üçün bir fürsət kimi dəyərləndirmələri ilə seçilirlər.
Onların fəaliyyətində diqqət çəkən əsas məqam sahibkarlıqla sosial məsuliyyətin bir arada dayanmasıdır. Çünki böyük biznes yalnız böyük rəqəmlər demək deyil. Böyük biznesin arxasında yüzlərlə insanın əməyini, ailələrin dolanışığını və bir şəhərin iqtisadi həyatını düşünmək məsuliyyəti dayanır. İş yerlərinin yaradılması, insanların əmək fəaliyyəti ilə təmin olunması, yerli iqtisadi fəallığa töhfə verilməsi sahibkarlığın cəmiyyətə verdiyi ən mühüm töhfələrdəndir.
Lakin insanın böyüklüyü yalnız qazandığı ilə deyil, qazandığını necə bölüşməsi ilə ölçülür.
Şahin, Rövşən və Elşən Məmmədov qardaşlarının xeyriyyəçilik fəaliyyəti ilə bağlı diqqət çəkən məqamların başında şəhid ailələrinə və qazilərə göstərilən dəstək dayanır. 44 günlük Vətən müharibəsi dövründə ordumuza və əsgərlərimizə dəstək göstərilməsi, müharibədən sonra isə şəhid ailələri və qazilərlə bağlı müxtəlif sosial təşəbbüslərin davam etdirilməsi bu istiqamətdə atılan addımlar kimi təqdim olunur.
Şəhid ailəsinin yanında olmaq adi yardım deyil. Bu, Vətən uğrunda ən müqəddəs qurbanı vermiş bir insanın ailəsinə ehtiramın ifadəsidir. Qazinin əlindən tutmaq, onun müalicəsinə dəstək olmaq, bir şəhid övladının ehtiyacını qarşılamaq isə cəmiyyətin öz qəhrəmanlarına sahib çıxmasının mənəvi göstəricisidir.
“İmperial” Şadlıq Sarayının şəhid ailələrinin, şəhid övladlarının və qazi ailələrinin xeyir işlərinə dəstək göstərməsi də bu baxımdan xüsusi məna daşıyır. Bir ailənin ən xoş günündə onun yanında olmaq, toy sevincini bölüşmək və müəyyən xidmətləri təmənnasız və ya güzəştli şəkildə təqdim etmək bəzən böyük bir maddi yardımdan daha qiymətli olur. Çünki insanın sevincinə şərik olmaq da xeyirxahlığın bir formasıdır.
Rövşən Məmmədovun təşəbbüsü ilə qazilərin müalicə və əməliyyat xərclərinə yardım göstərilməsi, aztəminatlı şəhid ailələrinin övladlarının təhsil və məktəb ehtiyaclarına dəstək verilməsi ilə bağlı təşəbbüslər isə bu sosial yanaşmanın başqa nümunələri kimi diqqət çəkir.
Bütün bunların arxasında bir həqiqət dayanır: xeyirxahlıq nümayiş üçün deyil, insan üçün ediləndə dəyər qazanır.
Şahin, Rövşən və Elşən Məmmədov qardaşlarının birliyi də ayrıca diqqət çəkən məqamdır. Onların bir-birinə dayaq olaraq qurduqları və inkişaf etdirdikləri biznes fəaliyyəti ailə birliyinin, qarşılıqlı etimadın və ortaq məqsədin gücünü göstərir. “Birlik harda, dirilik orda” deyimi burada sadəcə söz olaraq deyil, həyat və fəaliyyət fəlsəfəsi kimi səslənir.
Gəncə kimi qədim və özünəməxsus şəhərdə sahibkarlıq fəaliyyəti göstərmək, eyni zamanda şəhərin sosial həyatına töhfə vermək xüsusi məsuliyyət tələb edir. Çünki şəhər yalnız küçələrdən və binalardan ibarət deyil. Şəhər onun insanlarıdır. İnsanlara edilən yaxşılıq isə əslində şəhərin özünə edilən yaxşılıqdır.
İGİA.az olaraq cəmiyyət üçün faydalı olan xeyirxahlıq nümunələrinin işıqlandırılmasını vacib hesab edirik. Çünki yaxşılıq haqqında danışmaq yalnız bir insanı tanıtmaq deyil, başqalarına da nümunə göstərməkdir.
Şahin, Rövşən və Elşən Məmmədov qardaşlarının timsalında sahibkarlığın daha mühüm bir tərəfi görünür: qazancın dəyəri onu yalnız əldə etməkdə deyil, cəmiyyətə faydaya çevirə bilməkdədir.
İnsanın həyatda qoyduğu ən böyük miras nə var-dövlət, nə də yüksək vəzifədir. Əsl miras insanların yaddaşında qalan yaxşılıqdır. Bir şəhid ailəsinin duası, bir qazinin minnətdarlığı, bir uşağın sevinc dolu baxışı, ehtiyacı olan bir ailənin rahat nəfəsi…
Bəzən insanın adı böyük lövhələrdə deyil, məhz belə insanların qəlbində yazılır.
Və illər keçəndə sahib olduğumuz hər şey dəyişə bilər. Binalar köhnələ, bizneslər böyüyə və ya dəyişə bilər. Amma bir insanın etdiyi yaxşılıq yaddaşlarda yaşamaqda davam edər.
Çünki var-dövlət insanın sahib olduqlarını göstərir, xeyirxahlıq isə insanın kim olduğunu.
Şahin, Rövşən və Elşən Məmmədov qardaşlarının yolu da məhz bu mənəvi həqiqətin izləri ilə yadda qalır: qazandıqca bölüşmək, yüksəldikcə insanlara əl uzatmaq və sahib olduqlarını cəmiyyətin rifahına çevirmək.
Bəlkə də insan üçün ən böyük uğur elə budur — ardınca sərvət deyil, xeyirxahlıq qoymaq; adını insanların qəlbində yaşatmaq.
Famil Kəngərli
