20 Yanvar Azərbaycan xalqının tarixində təkcə qanlı faciə deyil, eyni zamanda haqq uğrunda mübarizənin, imanla yoğrulmuş iradənin və şəhidlik məqamının ucaldığı müqəddəs bir gündür. Bu tarix xalqımızın azadlıq eşqi ilə zalıma boyun əymədiyini, haqq yolundan dönmədiyini bütün dünyaya bəyan etmişdir.
1990-cı il yanvarın 19-dan 20-nə keçən gecə dinc insanlara qarşı törədilən amansız qırğın İslamın, insanlığın və vicdanın bütün prinsiplərinə zidd bir cinayət idi. Günahsız insanların – qadınların, uşaqların, qocaların qətlə yetirilməsi zülmün ən açıq təzahürü idi. Lakin Allahın ədaləti var və zülm heç vaxt əbədi olmur.
Uca Qurani-Kərimdə buyurulur:
“Allah yolunda öldürülənlərə ölü deməyin. Onlar diridirlər, lakin siz bunu dərk etməzsiniz.”
(“Bəqərə” surəsi, 154)
20 Yanvar şəhidləri məhz bu ayənin canlı təcəssümüdür. Onlar Vətən, azadlıq və haqq uğrunda canlarından keçərək şəhidlik zirvəsinə ucaldılar. Onların tökdüyü qan xalqımızın müstəqillik yolunu işıqlandırdı, milli ruhumuzu oyatdı və birliyimizi möhkəmləndirdi.
İmamzadə ziyarətgahı kimi müqəddəs bir məkandan baxdıqda, 20 Yanvar şəhidlərinin yolunun İmam Hüseyn (ə) yoluna nə qədər bənzədiyini görürük. Haqqa sədaqət, zülmə qarşı duruş və fədakarlıq – bu dəyərlər həm Kərbəlanın, həm də 20 Yanvarın ortaq mənəvi xəttidir.
Bu faciəyə ilk dəfə açıq və qəti mövqe bildirən Ümummilli Lider Heydər Əliyevin tarixi çıxışı xalqımızın haqq səsini dünyaya çatdırdı. Bu gün Azərbaycan Respublikasının Prezidenti cənab İlham Əliyevin rəhbərliyi ilə şəhidlərin xatirəsi daim uca tutulur, onların ailələri dövlətin diqqət və qayğısı ilə əhatə olunur.
20 Yanvar bizə bir daha xatırladır ki, azadlıq ucuz başa gəlmir. O, iman, səbir və qurban tələb edir. Bizim borcumuz isə bu şəhidlərin ruhunu şad etmək, onların bizə əmanət qoyduğu müstəqil dövləti qorumaq və gələcək nəsillərə haqq yolu aşılamaqdır.
Bu müqəddəs gündə bütün 20 Yanvar şəhidlərini, eləcə də Vətən uğrunda canından keçmiş bütün şəhidlərimizi ehtiramla yad edir, Uca Allahdan onlara rəhmət diləyirik.
Ruhları şad olsun.
Allah Vətənimizi qorusun.
Şəhidlər ölməz, Vətən bölünməz!
Hacı Tahir Abbasov
Gəncə İmamzadə ziyarətgahının Mütəvəllisi
