İranın Yaxın Şərqdəki ABŞ hərbi bazalarına hücumları müharibənin ilk iki həftəsində Vaşinqtona təxminən 800 milyon dollar ziyan vurub.
igia.az xəbər verir ki, bu barədə Strateji və Beynəlxalq Araşdırmalar Mərkəzinin hesabatı və BBC News-un təhlilində bildirilib.
İranın bölgədəki ABŞ hədəflərinə zərbələrinin vurduğu ziyanın tam miqyası məlum deyil. Lakin qeyd edilən 800 milyon dollar münaqişə uzandıqca, Vaşinqtona dəyən əhəmiyyətli ziyan barədə təsəvvür yaradır.
İranın cavab zərbələri, xüsusən də İordaniya, Birləşmiş Ərəb Əmirlikləri və digər Yaxın Şərq ölkələrindəki Amerika hava hücumundan müdafiə və peyk rabitə sistemlərini hədəfə alıb.
Zərərin əhəmiyyətli bir hissəsi İordaniyadakı hava bazasında yerləşən ABŞ-ın Thaad raketdən müdafiə radarına endirilən zərbə nəticəsində dəyib. Radar sisteminin dəyəri təxminən 485 milyon dollardır.
Həva hücumundan müdafiə sistemləri uzaq mənzilli ballistik raketləri ələ keçirmək üçün istifadə olunur.
İranın zərbələri ABŞ bazalarında və ABŞ qüvvələri tərəfindən bölgədə istifadə edilən hərbi obyektlərdəki binalara, tikililərə və digər infrastruktura təxminən 310 milyon dollar əlavə ziyan vurub.
Prezident Donald Trampın 28 fevralda İsrailə qoşularaq İrana hücum etməsindən bəri ABŞ 13 hərbi qulluqçusunu itirib.
ABŞ Müdafiə Nazirliyinin rəsmiləri Konqres üzvlərinə müharibənin ilk altı gününün 11,3 milyard dollara başa gəldiyini bildiriblər.
Hesabata görə, ilk 12 gün 16,5 milyard dollara başa gəlib. Pentaqon müharibənin maliyyələşdirilməsi üçün əlavə 200 milyard dollar tələb edir.
