12 dekabr – Azərbaycan tarixində dərin hörmət və ehtiramla anılan bir gündür. Bu gün xalqımız müasir müstəqil dövlətimizin memarı, ümummilli lider Heydər Əliyevi anır, onun misilsiz xidmətlərini böyük minnətdarlıqla xatırlayır. Azərbaycanın dövlətçilik ənənələrinin dirçəldilməsi, milli inkişaf strategiyasının formalaşdırılması və ölkəmizin dünyada söz sahibi bir dövlətə çevrilməsi məhz Heydər Əliyevin adı ilə bağlıdır. Onun siyasi irsi bu gün də Azərbaycan cəmiyyətinin bütün sahələrində yaşayır, inkişaf edir və gələcək nəsillərə yol göstərən bir məktəb kimi dəyərləndirilir.
"Embawood" şirkətinin Müşahidə Şurasının sədri Elşad Abbasov da 12 dekabr – Ulu Öndər Heydər Əliyevin anım günü münasibətilə böyük hörmət və ehtiramla fikirlərini bölüşərək bildirir ki, Heydər Əliyev təkcə bir siyasi lider deyil, həm də Azərbaycan xalqının taleyini dəyişdirən böyük dövlət xadimi, müdrik şəxsiyyət və milli dirçəlişin rəmzidir. Onun zəngin dövlətçilik təcrübəsi, uzaqgörən strateji qərarları və ölkəsini daim irəli aparmaq əzmi bu gün hər bir Azərbaycan vətəndaşı üçün nümunədir.
Elşad Abbasov qeyd edir ki, Heydər Əliyevin Azərbaycan iqtisadiyyatının inkişafına verdiyi töhfələr əvəzsizdir. Müstəqilliyin ilk illərində ölkədə yaşanan ağır sosial-iqtisadi böhrandan çıxış yolları məhz Ulu Öndərin qətiyyətli siyasəti ilə tapıldı. Bazara əsaslanan iqtisadi sistemin formalaşdırılması, xarici sərmayələrin cəlb olunması, qeyri-neft sektorunun inkişafına start verilməsi və xüsusilə də sahibkarlığa dövlət dəstəyinin əsasının qoyulması Heydər Əliyevin uzaqgörən iqtisadi siyasətinin mühüm tərkib hissələri idi. Bugünkü iri sənaye müəssisələri, özəl sektorun güclənməsi və Azərbaycanın regionun iqtisadi liderlərindən birinə çevrilməsi həmin siyasətin məntiqi nəticəsidir.
Elşad Abbasov - bu gün ölkədə sahibkarlığın inkişafı üçün yaradılan əlverişli mühit, dövlət tərəfindən göstərilən davamlı dəstək və iqtisadi sabitlik məhz Ulu Öndər Heydər Əliyevin qoyduğu möhkəm təməllər üzərində formalaşıb. Azərbaycanın qeyri-neft sektorunda fəaliyyət göstərən aparıcı şirkətlərdən biri olan "Embawood" da bu inkişaf strategiyasının bir parçasıdır və öz uğurlarını həmin sağlam iqtisadi baza üzərində qurub. Elşad Abbasov vurğulayır ki, Heydər Əliyevin sahibkarlığın inkişafına verdiyi önəm bu gün də öz aktuallığını qoruyur və ölkədə biznesin hərtərəfli inkişafı üçün geniş imkanlar yaradır.
Ulu Öndərin siyasi kursu bu gün Prezident cənab İlham Əliyev tərəfindən uğurla davam etdirilir. Azərbaycan həm iqtisadi, həm siyasi, həm də sosial sahələrdə böyük uğurlar qazanır, dünya miqyasında nüfuzunu artırır, regionda sülhün və inkişafın aparıcı qüvvəsinə çevrilir. Elşad Abbasov bildirir ki, Heydər Əliyev ideyalarının davam etdirilməsi ölkəmizin gələcək inkişafının əsasıdır və Azərbaycan bu yolla daim daha güclü bir dövlət olaraq irəliyə gedəcək.
Elşad Abbasov Ulu Öndər Heydər Əliyevin insanlara göstərdiyi qayğının, sosial rifahın yüksəldilməsinə yönəlmiş fəaliyyətinin də xüsusi vurğulanmalı olduğunu qeyd edir. Bu dahi şəxsiyyət hər zaman xalqı ilə bir idi, onun problemlərini öz problemi kimi qəbul edir, hər bir azərbaycanlının firavan yaşamını dövlət siyasətinin prioriteti hesab edirdi. Bu gün sosial sahədə həyata keçirilən geniş islahatlar, əhalinin rifahının yaxşılaşdırılması istiqamətində atılan addımlar da həmin siyasətin davamıdır.
12 dekabr həm də xalqımız üçün bir yaddaş, qürur və təşəkkür günüdür. Bu tarix yalnız kədər yox, həm də Heydər Əliyevin Azərbaycan üçün yaratdığı nəhəng irsə, inkişaf yoluna, milli birliyə və güclü dövlətçilik ənənəsinə ehtiramın təcəssümüdür. Elşad Abbasovun sözlərinə görə, Ulu Öndərin xatirəsi hər bir azərbaycanlının qəlbində əbədi yaşayır və onun qoyduğu irs gələcək nəsillərin də ən böyük sərvəti olacaq.
Bu gün Azərbaycan xalqı Heydər Əliyevi dərin hörmət və minnətdarlıqla anır. Onun ideyaları, müdrikliyi, Vətənə və xalqına sonsuz sevgisi gələcək nəsillərin yolunu işıqlandırmağa davam edir. Ulu Öndərin xatirəsi daim əziz tutulur və hər il olduğu kimi, bu il də 12 dekabrda böyük ehtiramla yad olunur. Elşad Abbasov bildirir ki, xalqın qəlbində yaşayan bu hörmət və sevgi Heydər Əliyevin Azərbaycanın taleyində oynadığı müstəsna roldan qaynaqlanır və bu müqəddəs xatirə əsrlər boyu yaşayacaq.
Allah rəhmət eləsin!
