“Yayda Qurban müəllimlə görüşümüz oldu. O mənə dedi ki, bu cür davam edəcəksənsə, yollarımızı ayıracağıq. Bildirdi ki, “indiyə qədər sənə çox güvənmişəm. Amma bu millətə, bu azarkeşə qarşı səhv edə bilmərəm”.
Bu sözləri "Qarabağ"ın futbolçusu Elvin Cəfərquliyev "Qafqazinfo"ya müsahibəsində deyib.
"Qurban Qurbanova bildirdim ki, nə qədər uğur qazanmışamsa, burada sizin və ailəmin əziyyəti danılmazdır. Ona söz verdim ki, özümdə çox dəyişikliklər edəcəyəm. Həm futbolçu olaraq, həm psixoloji olaraq özümü növbəti matçlara hazırlayacağam. O da mənə güvəndiyini, yenə də inandığını dedi. Bəzi uğurlar var idi ki, onları Qurban Qurbanovla qazanmaq istəyirdim. Çempionlar Liqasında oynamaq istəyirdim. Məhz onun rəhbərliyi altında bunu bacardım", - o söyləyib.
Cəfərquliyev oyun cəhətdən yox, psixoloji vəziyyətdən əziyyət çəkdiyini bildirib: "Bugünkü gündə mən tamamilə dəyişmişəm və yəqin ki, bunu siz də görürsünüz. Heç zaman oyun cəhətdən əziyyət çəkməmişəm. Əziyyət çəkdiyim yer öz psixoloji durumum idi və bunu dəyişməli, sakit olmalı idim. Şükür olsun Allaha ki, futbolçu olaraq da, komanda olaraq da uğurluyuq. Qırmızı vərəqə aldığım vaxt evdə də narazılıq bildirirdilər. Gəlirdim və evdəkilər deyirdi ki, “Sən niyə belə edirsən?”, “Allahın sənə verdiyi şansa niyə təpik atırsan?” Xarakterimə görə geri düşdüyümü deyirdilər. Həmin vaxt “Qara zolaq”da idim və ailəm yanımda oldu. Atam mənə çox motivasiya verib və bunu uşaqlıqdan bəri edib. Səbirli, təmkinli olmağımı istəyirdi”.
